mercoledì, 17 dicembre 2008
“Su Mutetu” 2008 - Is bincidoris e is àutus
Cumenti eus fatu ocannu passau seus aprontendi sa pubricatzioni de is àutus de su cumbènniu e prèmiu literàriu “Su Mutetu”. Su primu lìburu chi eus fatu, in su 2007 cun s'agiudu de sa lei sarda 26/97, est “Su cantu de sei in Sardìnnia - Su Mutetu”, Alfa Editrice. Ddui funt is artìculus de Marco Lutzu, Paolo Bravi, Costantino Casula, Paolo Zedda, Carlo Pillai e Sebastiano Pilosu. A prus, eus pubricau fintzas totu is mutetus premiaus cun is motivatzionis de sa giuria.
Sigumenti est unu traballu chi est pràxiu meda, ocannu puru ddui ant a essi is contributus de custus studiosus e de atrus puru, cumenti a Antonio Melis e Jean Jacques Andreani, chi ant a arricai de prus puru sa pubricatzioni cun d-una mirada internatzionali e de cunfrontu cun sa poesia sudamericana e corsicana e finas cun is espressionis noas de s'improvisatzioni cumenti e su “rap”. Prevideus chi po s'istadi de su 2009, sarvu atru strobu chi podit capitai, su lìburu at a essi pubricau.
E imoi is bincidoris de ocannu:
1 Guglielmo Piras, Cuartùciu-Sìnnia
2 Dante Erriu, Silius
3 Giuseppe Melis, Cuartu
1 mentzioni, Raffaele Piras, Cuartùciu
2 mentzioni, Edigio Quartu, Silius
1 sinnalatzioni, Bruno Melis, Sìnnia
2 sinnalatzioni, Ignazio Serra, Cuartùciu.
A si intendi in beranu intzandus cun su lìburu nou de “Su Mutetu” 2008 e in su 2009 po sa de tres editzionis de su cumbènniu e prèmiu literàriu “Su Mutetu” 2009.