giovedì, 11 dicembre 2008
"Ainas po su sardu"
“Ainas po su sardu - Materiali didattici per la lingua sarda”, Alfa Editrice, est su lìburu chi eus presentau sàbudu su 6 de mesi de idas a is 5 de a meri' (17.00) in su Ex Guventu de Santu Franciscu in bia “Brigata Sassari”.
Est una parti de su materiali chi is docentis de su cursu de sardu ant manigiau po is letzionis insoru e finas cun atra cosa mai pubrica prima, cumenti a unu processu in sardu-logudoresu de su 1600 de su tribunali de Tèmpiu, a incuru de Franciscu Carboni e una prèdica in sardu-campidanesu de su 1700, a incuru de Càralu Pillai. Ddui funt fintzas scritus de poesia, lìngua, lei, didàtica e totu is ainas chi podint serbiri po traballai beni cun su sardu.
Funt bènnius giai totu is docentis de su cursu: Càralu Pillai, Franciscu Carboni, Pàulu Zedda, Debora Steri, Franca Marcialis, Franciscu Cheratzu, Màriu Puddu e is scientis de su cursu. Antiogu Ghiani, po mala sorti, at tentu strobu e no nci dd'at fata a benni. Antoni Pani, s'Assessori, at saludau a is presentis e at nau duus fueddus apitzus de is fainas po sa lìngua sarda chi est mandendi a innantis s'Assessorau. Mancu a nai ca sa lìngua ufitziali de totu is chi ddui fiant fiat su sardu.
Est un'aparìciu de s'Assessorau a is Polìticas po su Spetàculu, Connotu e Lìngua Sarda e de s'Ufìtziu Lìngua Sarda, cun s'agiudu de sa lei 482/99 de su Stadu Italianu.