In Cuartu chistionaus su Campidanesu. Cumenti scieus totus, su Campidanesu est sa fueddada prus spainada e prus unia de su sistema linguìsticu sardu, perou mancai diaici, tenit calincuna diferèntzia piticheddedda tra is fueddadas cosa sua. Unas cantu cosas chi si distinghint funt custas:

• S’assimiladura, est a nai nosu si papaus sa R candu est ananti de sa T e TZ, artu > atu, artziai > atziai e aici sighendi.
• Sa L in mesu de duas vocalis bessit cumenti una R frantzesa o tedesca, fata cun su gùturu, in italianu custu sonu si nàrat r uvulare. Custu sonu ddu lassaus a sa fueddada e no po su scritu, ca est sèmpiri mellus a scriri soli e malu, mancai calincunu in su tempus passau scriessit sorhi po soli e marhu po malu.
• Metàtesi, est a nai chi sa R aintru de is fueddus si movit meda, po nai, sirboni > sriboni, margiani > mraxani e aici sighendi.
• No imperaus su pronòmini DDI ma imperaus sèmpiri su DDU/DDA, ddi nant > ddu nant, ddi praxit > dda praxit.
• Bessidas partigularis de su passau de is verbus:

                          essi                timi                 biri                  scriri

• deu                femu               timemu           biemu             scriemu
• tui                   fest                 timèst             bièst               scrièst
• issu                fet                   timèt               bièt                 scrièt
• nosu               femus            timemus         biemus           scriemus
• bosatrus        festis              timestis          biestis            scrièstis
• issus              fent                 timènt             biènt               scriènt

Is cunsillus e is agiudus de sa genti de Cuartu ddus agradesseus meda, po sighiri a amanniai custa setzioni.